१. पश्चिमाई होळी विशेषांक - स्वागत (रवी दाते)

“हुताशनी पौर्णिमा” या शब्दाचे गांभीर्य आणि पावित्र्य काळाच्या ओघात लुप्त होत असल्याची आणि रंगपंचमीच्या नावाखाली धुमाकूळ घालण्याची आपली देशी परंपरा परदेशात रुजत असल्याची कधी कधी थोडी खंत वाटत असली तरी सर्व भारतीयांना एकत्र आणण्यासाठी असलेले या सणाचे योगदान नाकारता येत नाही.

एकदा का धुळवडीच्या रंगांच्या मुखवट्याआड तोंड दडले की लहान थोर, पंजाबी, मद्रासी, मुंबईकर, पुणेकर, मुंबईतील सेंट्रल आणि वेस्टर्न रेल्वे असे अनेक देशी भेदभाव नाहीसे होतात आणि उरतो तो फक्त आनंदाचा जल्लोष. जल्लोष आहे आणि त्याला हिंदी चित्रपटातील संगीताची साथ नाही असं होणं शक्यच नाही मग तो जल्लोष “चाहे भीगे तेरी चुनरिया” सारखा सूचक असो की अगदी अलीकडच्या “हाय ये होली, उफ ये होली” सारखा विदेशी चालीवरचा थेट आणि बेफाम असो. याच रंगात “खाए गोरी का यार, बलम तरसे” च्या पावलावर पाऊल टाकून काही हातातून निसटणारे आणि दुसऱ्या हातात अलगदपणे जाऊन पडणारे हातही दडून जातात.

तर अशा रंगीबेरंगी आनंदात भर टाकण्यासाठी पश्चिमाईचा हा दुसरा अंक; फक्त संपादक मंडळाच्या  लेख आणि कवितांनीच नव्हे तर नवोदित लेखक आणि कवींच्या योगदानाने संपन्न झालेला. ही मंडळी कोणी परकी नाहीत तर चक्क इंग्लंड मधील स्थानिक, आपल्याच आजूबाजूची, रोज भेटणारी, आपल्याला व्हाट्सअप वर विश करणारी आणि अडीअडचणीला धावून येणारी आहेत. या सर्व “छुप्या रुस्तुमांना” शोधून त्यांना प्रोत्साहन देण्याच्या, आणि लिहिण्यासाठी प्रवृत्त करण्याच्या आमच्या प्रयत्नात सहभागी झाल्याबद्दल त्या सर्वांचे आभार.

या अंकात राहुल गडेकरांची ‘गझल’ वरची ‘गझल’ आहे, नेहा बापट अन्वेकरांची मातृत्वावर कविता आहे, जागृती जोशीने स्वत:च्याच मनाशी संवाद साधला आहे,  डॉक्टर आनंद शिंत्र्यांच्या “बाल मैत्रिणी”च्या आठवणी आहेत आणि बाल मित्रांकरिता वि मा  जोशींची ‘मामाच्या देशात जाऊया’ ही एक विशेष कविता पण आहे. आणि on-line मराठीचा डोस जरा जास्तच झाला तर काय करावे हे सांगायला श्रीकांतजींचे “मोफत ज्ञान”ही आहे.

पहिल्या अंकाच्या संगणकीय आणि छापील आवृत्त्यांना मिळालेला उदंड प्रतिसाद आम्हाला नक्कीच स्फूर्तीदायक आहे. असाच लोभ असू द्यावा. आपल्या आजूबाजूला असलेल्या कलाकारांबद्दल वाचायला आम्हाला नक्कीच आवडेल, तरी त्यांना शोधा आणि असेच लिखाण पाठवत राहा.

आमच्या हातून काही चुका झाल्या असतील आणि अंकात काही न आवडलेले लेख असतील तर या सणानिमित्त त्यांची “होळी” करण्याच्या संधीचा जरूर फायदा घ्या, पण त्याआधी आपल्या प्रतिक्रिया नक्की कळवा.

सर्वांना होळीच्या शुभेच्छा.

रवी दाते.