३.३ कविता - संवाद परदेशातील मनाशी (जागृती जोशी )

संवाद - परदेशातील मनाशी  

 जागृती जोशी

 https://youtu.be/rQtCXNyF_vU?si=JN_XWWoc246DC7UR

एकदा मी मनाशी संवाद साधला......

रे मना, का तू आठवणीत गुंततोस,
चलचित्र भूतकाळातील डोळ्यांपुढे का उभारतो ||१||

का आठवतोस तो कट्टा, ते मित्र आणि त्या गप्पा, 
का सारखा सारखा आठवतोस तो आईच्या हातच्या जेवणाचा डब्बा ||२||

कोणास ठाऊक आता जागेवर असेल तरी का ती चहा-वडापाव ची टपरी,
मोडून तोडून Renovate झाली असेल ती सगळी नगरी ||३||

पारंपरिक सणांची खास मजा अशी आता उरलीये कुठे,
शनिवार रविवार जोडून येताच बनतो Holiday Plan पुढे ||४||

माणसा-माणसात आता DIGITAL Connect वाढलाय,
हातावर टाळी आणि पाठीवर थाप याचा जणू काळच उलटलाय||५|| 

"मित्रांना भेटून त्यांची प्रवासवर्णन ऐकावी " ही प्रथाच जणू मागे पडलीये,
मिनिटं-मिनिटाला status story ची update येऊ लागलीये ||६||

रे मना, बघ जरा परदेशात आपण राहतो,
ही अशी चकाकी आणि स्वप्नातली जादुई नगरी रोजच अनुभवतो ||७||

चल मग, रमून जाऊया आता आपल्या या नव्या जगात ,
सोडून दे आता त्या जुन्या आठवणींचा थरथरणारा हात ||८||

रे मना, चल दे तू आता मला पूर्ण साथ, 
मिळुनी सर करू आव्हाने आणि करू जगावर मात ||९||

यावर मन माझं म्हणतंय कसं......

खरंय तुझं, का उगाच अडकावं आणि उजळवाव्या जुन्या आठवणी,
तसं पहिला तर खरंच पुसट झालीये आता आजोबांनी सांगितलेली कहाणी ||१०||

चकाकीच्या या जगात चल हरवून जाऊया ,
परतून मागे न पाहता, रोज नवनवीन गोष्टी अनुभवुया||११||

पण एकदा मला सांग , खरंच जमेल का तुला हे,
धावता धावता कधीच विसावणार नाही अशी शपथच घे ||१२||

सांग बरं मग का शोधतो तू Indian Community चा group ,
सणवार , भजन कीर्तन यात कसा रमतोस तू खूप ||१३||

परदेशी राहून पण गप्पा सगळ्या देशी,
पुणे-मुंबई वर बोलतांना menu हवा खान्देशी ||१४||

सांग बरं, परदेशातल्या आपल्या इटुकल्या-पिटुकल्यांना का घालतोस संस्कार वर्गात,
रंगून जाऊदे कि त्यांना पण या बदलाच्या पर्वात ||१५||

अजूनही का लागते तुला मायदेशाची ओढ ,
रमून जा की या चकाकीत आणि परतण्याचा विचारच सोड ||१६||

मायदेशात निरोपाच्या वेळी येत न मन दाटून आणि होतात न अनावर अश्रू,
घट्ट मिठी मारून सांगतोस ना "आम्हाला नका विसरू" ||१७||

कितीही धावलास या जादुई नगरीत तरी माघारी तू फिरशील,
बाबांच्या मिठीत आणि आईच्या कुशीतच तू विसावशील||१८||

लक्षात ठेव, युगे बदलली अनेक आणि लोटला मोठा काळ, 
पण एकाच सांगतो, अशी कधीच तुटत नाही हि अदृश्य नाळ ||१९||

जागृती जोशी 
Altrincham UK