३.१ कविता - मनी या कसे हे नवे गीत येते (श्रीकांत पट्टलवार)

मनी या कसे ही नवे गीत येते 

श्रीकांत पट्टलवार 

कळेना असे हे मला काय होते
मनी या कसे ही नवे गीत येते 

कुणी गीत गाई कुणाच्या मनीचे 
कुणी आळवी रोज सूर रागिणींचे  

सूर-शब्द माळेतून गुंफून येते  
मनी या असे हे नवे गीत येते 

कधी भेटती मित्र उमलत्या दिसांचे 
सजू लागती सोहळे त्या क्षणांचे

क्षणातून स्वप्नांच्या हळूच ते उमलते
मनी या असे ही नवे गीत येते 

कुणी गाव सोडी कुणा खंत वाटे 
कुणी धाव घेता कुणा धन्य वाटे

तया पाहताना  मला ते उमगते
मनी या असे हे नवे गीत येते 

कधी गात फिरतो मी गीत जीवनाचे 
कधी ऐकतो ते झऱ्यांचे, घनांचे 

धरा ही जशी या वसंतात फुलते 
मनी या असे हे नवे गीत येते 

- श्रीकांत पट्टलवार