३.६ 'ग' ची बाधा (सदर) - गीत: सांज-वारा (कुमार जावडेकर)

सांज वारा – युगुल गीत 

कुमार जावडेकर

(तोः) साथ सांजेस त्या पाहिले रंग ते, लेवुनी सांग येशील का?
सांग ना, सांग येशील का?
(तीः) सांजवाऱ्याप्रमाणे मला स्पर्शण्या, धावुनी सांग येशील का?
सांग ना, सांग येशील का?

(तीः) ते क्षणांचे सखे! रंग विरतात ना...
(तोः) पण स्मृती होउनी रंग उरतात ना!
तू मनाला तुझ्या एवढे आज समजावुनी सांग येशील का?
सांग ना, सांग येशील का?

(तोः) वागतो नेहमी स्वैर वारा किती!
(तीः) बाळगे ना मनी तो जगाची क्षिती...
अंतरी आपुल्या आज विश्वास तू ठेवुनी सांग येशील का?
सांग ना, सांग येशील का?

- कुमार जावडेकर, स्टॅफोर्ड, यु. के. 

टीप: एकदा मी रेडिओवर एक हिन्दी गाणं ऐकलं. ती चाल डोक्यात घोळत होती. मग त्या चालीत शब्द भरून एक वेगळंच मराठी भावगीत करता येईल का असा विचार करून, केवळ एक प्रयोग म्हणून, मी हे मराठी गीत लिहिलं. बाकी दोन्ही गाण्यांच्या शब्दांत किंवा अर्थात बाकी काही साम्य नाहीये.