भ्रमंती
क्षणात येथे, क्षणात तेथे फिरून येशी
मना भ्रमंती कुठे कुठे तू करून येशी?
छतातुनी या सदा बरसती तुझेच अश्रू
उरी प्रलय तू कशास इतका भरून येशी?
'सुरू करूया पुन: नव्याने' म्हणून का तू
जुने बहाणे पुनः नव्याने स्मरून येशी!
घडून येतो जरा दुरावा जसा मनाला
कलीप्रमाणे मनात माझ्या शिरून येशी...
सभोवताली इथे नशीली प्रलोभने अन्
'कुमार'-वय तू उगा मनी का धरून येशी?
- कुमार जावडेकर, स्टॅफोर्ड, यु. के.
No comments:
Post a Comment
प्रतिसाद