३.५ ओढ (लीना फाटक)

ओढ

- लीना फाटक

'बच्चा बोला देखकर मस्जिद आलीशान 

अल्ला तेरे एक को, इतना बडा मकान'

निजा फाजली यांचे दोहे.  

'पोर बोलले पाहून, मशीद आलीशान
अल्ला एकट्या तुलाच, घर केवढे महान'

श्री. सदानंद डबीर यांचा भावानुवाद.

वरील निदा फाजली यांचे दोहे आणि श्री. सदानंद डबीर यांनी केलेला त्याचा भावानुवाद वाचला. त्यात त्यांनी मस्जिद हे अल्लाचे एकट्याचे व आलिशान घर आहे असं म्हटलं आहे. आपणही मंदिर हे आपल्या पण देवाचं घर आहे असं म्हणतोच. माझ्या मनात विचार आला की आपण, आपल्या भारतीय, हिंदू संस्कृतीमध्ये परमेश्वर हा सर्वव्यापी आहे.  प्रत्येक अणुरेणूमध्ये, चराचरात परमेश्वर आहे असं आपण मानतो.  मग एवढ्या सर्वव्यापी परमेश्वराला फक्त "मंदिर" हेच इतकं छोटंसं घर असून कसं चालेल? एवढ्या सर्वव्यापी परमेश्वराचं "अंतराळ" हेच  घर असू शकेल. आणि एकदा घर म्हटलं की त्या घराला आत जायला व बाहेर पडायला  दार असायलाच हवं. अंतराळातून आपण पृथ्वीवर जन्म घेतो. आणि सर्व कर्तव्यं, कर्मं, जबाबदारी पार पडली की मृत्यूच्या द्वारे परत आपण आपल्या अंतराळातील घरामध्ये जातो. अंतराळातून पृथ्वीवर यायला जन्म हेच एक दार आहे. आणि नंतर जन्म संपला की मृत्यूच्या दारातून परत अंतराळात विलीन होतो. अशी जन्म आणि मृत्यू ही या "अंतराळाच्या" घराची दारे आहेत. आणि या सगळ्या विचारातून "ओढ"  हा अभंग माझ्या हातून लिहिला गेला. तो तुम्हाला आवडेल अशी मी आशा करते.  धन्यवाद.

"ओढ"  

सर्व अंतराळ
देवा तुझे घर 
एकच ते दार
"जन्म-मृत्यु"  ||१||
 
मालक घराचा
असे तू एकला 
निवारा आम्हाला
तूच देशी ||२||

लोभ मोह माया
सुटेना आम्हाला 
करी सर्वकाला 
येरझारा ||३||

चिरंतन स्थान 
नसे  सर्वजना
संत महंतांना
मोक्ष देशी ||४||

वंदिते चरण 
सुटो कर्म-काम
मुखी राहो नाम
अखंडित ||५||

लागली मनासी 
ओढ तुझी फार
उघडरे दार 
झडकरी ||६|| 

"अभंग" या छंदात केलेली रचना. 

लीना फाटक, वाॅरिंग्टन, यु. के.  
२२ जानेवारी २०२६.